।। राम राम सा ।।
जोत उजाळी
लोग ठेठ सूं
भटकण लाग्या
पेट-पीठ खेल में
चुन्दड़ी संग अंगरखी फाटी
ऐडी फाटी गेल में
ऊंडी आंख्यां नाड़ डोलती
जग री रेलमपेल में
धूप झेलता
छावां ठेलता
कैदी जीवण जेळ में
राजाजी रंगम्हैला में
खेत निराया
फसलां काटी
असल डूबगी भेळ में
स्याळ भरोसै खेती पाकै
कगलियां री सैल में
कूड़ा-कूड़ा भांग उळीचै
सड़क सांकड़ी गेल में
मिनकी थामै
दूध चाकरी
तिरै माखियां तेल में
गीली बलै
सूखी बलै
लकड़ी धुप्पल-धैल में
घणी डूबगी
अब नीं डूबै
जोत-उजाळी तेल में ।
कोई टिप्पणी नहीं:
एक टिप्पणी भेजें