मारवाङी कविता
नवी बीनणी
कोड करे जी कोड करे
सगऴो घर लाड करे
देवर चावे म्हांसूँ बोले
पण नवी बीनणी लाज मरे
चोटी इणरी नागण है
जाणे उतरतो फागण है
बोले तो यूँ लागे ज्यूँ
बिना गत री जागण है
चूङ कङी बेङी हाँयली
नवी बीनणी पेरे कोनी
भारी भारी टोटियाँ
कानाँ में अब टेरे कोनी
डोकरी डोकरे सूँ कँवळे लारे
छाने बाताँ करे है
म्हें सुण्यो है आंपाळो बेटो
बीनणी ऊँ डरे है
कानाँ में इयरफोन लगा
फिल्मी गाणा सुणे है|
डीजे आळा गीताँ पे आ
भोपी ज्यूँ धूणे है||
बतळावे तो बोले कोनी
बोले तो बोले गाळियाँ|
सासू ने गवायो मोरीयो
चलो बजाओ ताळियाँ||
अँगूठा छाप सासू आगे
अँगरेजी री नाङ हिलावे|
आई वाई बिन बोले कोनी
इडियट गळो फाङ चिल्लावे
चैटिंग-वैटिंग आदत पङगी
आ आदत अब छूटे कोनी|
अँगरेजी आळा फलका अ
फोङियाँ बिगर फूटे कोनी|
सुसरो जद माँगे डोडा
नवी बीनणी भाँगे गोडा
डोडा बिना चाले कोनी
बुढा टाँगङा हाले कोनी
बीङी चिलम माँगे तो
कालिंदर ज्युँ लेवे डस
ऊपर सूँ अँगरेजी छाँटे
स्मोकिंग इज डेंजरस
पाङोसियाँ री लुगायाँ सँग
दिनङो बीते बाताँ मेँ|
हथायाँ री कोडावण
घर मोङी आवे राताँ में|
घर आताँ ही होवे चैकिंग
ज्यू जनधन आळा खाता मे
जै निकळे कोई कमी पेशी
ले लट्ठ ने हाथाँ मे
सासूजी रा मौर पकाया
नवी बीनणी लाताँ में
बीनणी जीमै चुपङी रोटी
सासू ने जीमावे कोरी
बिना ग्रीस हाड घूमे कोनी
कटे आ जिंदगी दोरी
राम रटण गी उमर में
मरां मरां री रट रटे
सुसरे जी री बैठक लागे
कुतो बेवे जठे
आखे घर गा जूठा ठाँव
सासू अब धो
करम तो कदी फूटा
अब किस्मत नै रो
कोई टिप्पणी नहीं:
एक टिप्पणी भेजें