राजस्थानी कविता-संग्रह

।। राम राम ।।
आधी रोटी भावै कोनी ,
दादोजी परणावै कोनी !
मन री बाता मन मं रैगी ,
भुवा मगंळ गावै कोनी !!
दादीजी कद क्हाणी केसी ,
कद चिंकली हुंकारा देसी
ऊपर स्युं डांफर बाजै है ,
राळी भी ओढावै कोनी
बापु खैत खङै रोजिना,
नित री राङ करै रोजिना
माऊ नै सगळा धमकाव ,
बापु नै कोई समझावै कोनी !!
गाय ब्यायगी बछियो ल्याई ,
घर बाखऴ मे धूम मचाई
सगळा कोड करै बछिये रा ,
बछियो ताबै आवै कोनी
बङकी बैटी बर्तण मांजै ,
खुङका स्युं अम्बर सो गाजै
रिसा बळती बर्तण फैंकैं ,
धिरेसी सिरकावै कोनी
नानुङो भी चुप नीं रैवै ,
बात आप री किण बिद कैव
एकै सांस रोवण लाग्यो ,
कोई भी बतऴावै कोनी
काकी गीत गोर रा गा री ,
चोकी पर सै धूम माच री
बङै मजै स्युं दांत दिखावै ,
कोई स्युं सरमावै कोनी !
कुण जाणै कद नींन्द आयगी ,
धीरे-धीरे रात छायगी
पौ पाटी जद आंख्या खुलगी ,
अब तो सपनो आवै कोनी
बालपणै री दुनिया छोटी ,
भाईङो कद चिन्ता ही मोटी
खैल-कूद , खाणै-सोणै के सिवा
ओर कीं अब भावै कोनी !