कजली तीज

  कजली तीज

गौरी गजबण बणी तीजणी!
सजधज नें सोलह सीणगार!!

सावण बित्यो आज सखी,
                 पिव आसी म्हारे घर द्वार!
हिचक्यां आवे म्हने जोर की,
             हिवड़ो हरखे अनन्त अपार!!
कंवले बोले  म्हारे कागलो,
              कोयलड़ी  करे है पुकार!
दिन आंथम्या आज आगणे,
              आ ज्यासी म्हारा भरतार!!
गोरी गजबण बणी तीजणी,
सजधज नें सोलह सीणगार!!

उड़ जा थूं काला कागला,
             कोयलड़ी  पांख्यां संवार!
हाथां मेहन्दी और महावर,
             ओढण नें दिखणी रो चीर!!
चढ़ चढ़ जोऊं डागले,
              मनड़ो धरे नहीं अब धीर!
कजली सातू तीज का,
            साजण आवण रा समाचार!!
गोरी गजबण बणी तीजणी!
सजधज नें सोलह सीणगार!!

कड़ियां कणकती सोवणी,
                पहरण बाजु लूम्बादार!
बिछिया सोवे सोवणा,
                पायलड़ी री झणकार!!
मांग भरी गज मोतीयां,
                काजल, टीकी  सीणगार!
कानां झुमका बाजू लुमका,
               गोरड़ी निरखे है बारम्बार!!
गजबण गोरी बणी तीजणी!
सजधज नें सोलह सीणगार!!

माथा मैमद प्यारो लागे,
                तिलड़ी,टीको भलकादार!
नाकां नथड़ी हीरा चमके,
               नैणा काजल सूरमो सार!!
कंठी,तीमणीयो पहर तेवटो,
               सोवे गले नवलखो हार!
हाथां हाथी दांत  चूड़लो,
              नखल्यां पर हिंगलु सार!
गजबण गोरी बणी तीजणी!
सजधज नें सोलह सीणगार!!

आज सखी म्हारे आंगणे,
              ऊगसी रश्मी रो भरतार!
फूंदी ज्यूं  फिरे फूदकती,
               करे सहेल्या नें मनवार!!
झीरमिर झीरमिर मेहा बरसे,
              शीतल पड़ रही फुहार!
पीव परणी रा सायबा,
            अब घर आ जाओ भरतार!!
गजबण गोरी बणी तीजणी!
सजधज नें सोलह सीणगार!!

चांदड़ल्या थारे चानणे,
        पिया परदेशी री मनवार!
घणे हेत सुं करे सिरावण,
       पिव निरख निरख घर नार!!
चूड़ा चूंदड़ी अमर सुहागण,
       राखे सदा थारा करतार!
"श्यामसिंह" रहिजे सतवन्ती,
      भारत भूमि री लिछमी नार!!