मरूधरा री चिड़कली

चिडकली
ढाटाणे री धरा सुरंगी , मिन्नखां तणो सुकाळ चिङकली !
हैत , नेह अर अपणायत रा , भरीयोङा भीमतळाब चिङकली !
लूँठा , जब्बरा मिन्नख - मानवी , रीतां - कोडां री खाण चिङकली !
जूनोङा मिन्नखां री चीतां , थारे संगङे लाव चिङकली !
जात - पाँत सूँ कोसां दूर , भायां तणो जुङाव चिङकली !
कैर , खेजङी , कूमटियां नें , मन्नङो घणो हुलराव चिङकली !
कोसां , बरतां , जांतरियां री , आवे रूङी याद चिङकली !
काचर , बोर , मतीरा मीठा , आवे जाजा याद चिङकली !
गोरी गायाँ , करहळिया तेला , छोङ्या धोरां माँय चिङकली !
जद - जद चीतां आवे मायङ , हिवङो भर - भर जाय चिङकली !
अवळू आवे घणे मान सूँ , ओ मीठा चित्तराम चिङकली !
एक बार तूँ उङने जाइजे , दीजै सात सलाम चिङकली !
मातरभौम सूँ हैत अणूतो , आवे टुकटुक याद चिङकली !
ढाटाणे री धरा सुरंगी , म्हे थाँह पर कुरबान चिङकली !